¿Mnïjää’wïp mejts tii? Ïxäm, yä’ätpë xëëw, makoxk änp ja myïmajtskpë po’, tïkëëk jumëjt y’apety yä’ät awä’äts et Tlahuitoltepec.com, tïkëëk jumëjt mää të nyaxy ja ääw ayuujk, mää të yïkpïktä’äky ja awänäx, ja käjpxpoo’kxïn; mää nï’amukï yïktaxontä’äky, yïkjää’myetsy atëm ja njujky’äjtïn, ja ntääk’amëj ja nteety’amëj ja tsyënää’yïn tyanää’yïn miti’ ja’ ojts ja nteety ja ntääk ttukmïtäntë jïts atëm ïxäm njaakjakyejpyïntë.
Tyoskujuyïpts meets tu’uk jatu’uk myïkmëëpy yä’ätpë xëëw, ku meets jate’n mjamyëët’aty, ku mpukäjpxïtë mpuxeekïtë, ku xtsuj’ejxtë ku x’ëyjäwitë tiijaty yää yïktunp jïts nayïte’n xyïkpojwä’kxtë ja ääw ayuujk, ja awänax jïts jate’n amukï n’ijxyïntë njää’wï’antë.
Jantsy natyu’uk yä’ät awä’äts et ïxaa jyäwï y’ejtnï; tutä’äkyts jïte’n jë wenk wïnmää’ny jajp jyayë’ëyy jyakëjy jïts nïytïkätsy tyunnït, mää nï’amukï nëjkx nyïktunkpääjtyïntë, mää nïtuki’iyï nejkx nnänky’ijxyï’antë ja «n’ejxïn», sutsoo’ampy atëm n’ijxyïntë njää’wï’antë ja n’ayuujk jujky’äjtïn.
Jamts meets mïku’uk xkupëkt yä’ät ääw ayuujk, yä’ät käjpxpoo’kxïn jïts meets nayïte’n jë mja’ x’ukpïktä’äkt.
Tyoskujuyïp